काभ्रेको बनेपास्थित विद्यासागर अङ्ग्रेजी माध्यमिक विद्यालयको तीसाैं स्थापना दिवसको अवसरमा काभ्रे जिल्ला अन्तर विद्यालय तीज नृत्य प्रतियोगिता सम्पन्न भएको छ । प्याब्सन काभ्रेको सहकार्यमा भएको उक्त प्रतियोगितामा बाग्मती अङ्ग्रेजी माध्यमिक विद्यालयको टाेली प्रथम भएको छ ।
हरितालिका तीजको अवसर पारेर आइतबार आयोजना गरिएको उक्त प्रतियोगितामा पनाैतीस्थित काभ्रे अङ्ग्रेजी माध्यमिक विद्यालयले दाेस्राे र नालास्थित स्प्रिङ हिल माध्यमिक विद्यालयले तेस्रो स्थान हासिल गरे । बनेपास्थित नाइटेङ्गल माध्यमिक विद्यालयले सान्त्वना पुरस्कार प्राप्त गरेको छ ।
३४ टोलीले भाग लिएको उक्त प्रतियोगितामा प्रथम द्वितीय र तृतीय हुने टाेलीले क्रमश: २५ हजार र ट्रफि, २० हजार र १५ हजार रुपैयाँ नगदसहित मेडल र प्रमाणपत्र प्राप्त गरेका छन् । सान्त्वना पुरस्कार प्राप्त गरेको नाइटेङ्गल माध्यमिक विद्यालयले १० हजार रुपैयाँ नगदसहित मेडल र प्रमाणपत्र हात पारेको छ ।
कार्यक्रममा बाग्मती अङ्ग्रेजी माध्यमिक विद्यालयका नृत्य प्रशिक्षक निशा कार्कीलाई उत्कृष्ट नृत्य निर्देशक घोषणा गरिएको थियो । कार्कीलाई १० हजार नगद, मेडल र प्रमाणपत्र प्रदान गरियो ।
प्रतिक्रिया दिनुहोस्